Bryndís Björnsdóttir skoðar kúrdískar fjallkonur og Afríkuveiðar Íslendinga í gjörningi í Berlín
Íslenska fjallkonan í líki kvótadrottningar skaut upp kollinum í gjörningi í Þýskalandi á dögunum.
Gjörningurinn Mountain Woman – Tunes to FaceTime eftir Bryndísi Björnsdóttur myndlistarkonu fór fram í gömlum varðturni austurþýska lýðveldisins í Schlesischer Busch í Berlín, en áður var hann notaður til að koma í veg fyrir að landsmenn flýðu yfir Berlínarmúrinn til Vestur-Þýskalands. Gjörningurinn var fluttur í tilefni að fyrstu útgáfu tímarits The Many Headed Hydra, alþjóðlegs rannsóknarverkefnis um hinar ýmsu birtingarmyndir vatns og vatnaferðalaga.
Í tímaritinu var meðal annars fjallað um gjörning Bryndísar sem var fluttur í Liechtenstein í fyrra, þar sem hún hafði brugðið sér í hlutverk göldróttar kvótadrottningar og vildi þannig takast á við það sem hún kallar „ný-nýlendustefnu Íslendinga í fiskveiðum,“ og á þar meðal annars við veiðar Samherja úti fyrir ströndum Afríku.
Í gjörningnum í Berlín hafði kvótadrottningin hins vegar smám saman umbreyst í persónugerving íslensku þjóðarinnar, svartklædda fjallkonu – með stígvél á höfðinu og umkringda dauðum fiskum – sem söng baráttulög kúrdísku kvennahreyfingarinnar í Rojava, en sú hersveit hefur barist hetjulega gegn vígamönnum Íslamska ríkisins á undanförnum árum.
„Konur þessarar kúrdísku hreyfingar eru oft skilgreindar sem „fjallkonur“ þar sem fjallið hefur mikla merkingu í menningu Kúrda enda hefur sá staður veitt þeim skjól í áraraðir og þar eiga helstu átökin sér stað enn í dag,“ útskýrir Bryndís fyrir blaðamanni. „Gjörningurinn endurskilgreinir hugmyndina um íslensku fjallkonuna með því að beita rödd hreyfingar sem þessa stundina er að leggja grunn að nokkurs konar lýðræðislegu ríkisleysi þar sem réttindi kvenna eru eitt helsta undirstöðuatriðið.“
Milli þess sem Bryndís söng baráttusöngvana sýndi hún fjallkonuútgáfu af frægu ávarpi Receps Edogan Tyrklandsforseta á myndbandsforritinu FaceTime í beinni útsendingu meðan valdaránstilraun stóð yfir.
Bryndís segir að framhald verði á gjörningnum og vangaveltum um kvennahreyfinguna í Rojava í haust og verður það hluti af The OH-project sem er samstarfsverkefni fimmtán lista- og fræðimanna hvaðanæva að úr heiminum, sem fer fram í og er innblásið af gömlu NATO-herstöðinni að Ásbrú.
Konur þessarar kúrdísku hreyfingar eru oft skilgreindar sem „fjallkonur“ þar sem fjallið hefur mikla merkingu í menningu Kúrda.
