Óðurinn til gleðinnar, fjórði kafli níundu sinfóníu Ludwigs van Beethoven er uppáhaldstónverk Íslendinga samkvæmt kosningu á vef RÚV. Þetta var tilkynnt á sunnudagskvöld, en þúsundir tóku þátt í kosningunni sem stóð yfir í sumar á sama tíma og þau 40 verk sem voru tilnefnd voru kynnt í útvarpsþáttunum Klassíkin okkar á Rás 1.

Athygli vekur að ekkert þeirra níu sígildu tónverka sem eru í sérstöku uppáhaldi hjá Íslendingum er eftir konu. Kvenkyns tónskáld hafa lengi verið allt að því ósýnileg í sögubókum vestrænnar tónlistar og þrátt fyrir nokkrar tilraunir til að grafa þær upp og rétta stöðu þeirra eru karlarnir greinilega ennþá þekktari og vinsælli.

Verkin í níu efstu sætunum verða spiluð á sérstökum hátíðartónleikum Sinfóníuhljómsveitar Íslands í Hörpu 2. september næstkomandi en það eru eftirfarandi tónverk:

1. Ludwig van Beethoven – Sinfónía nr. 9, 4. kafli (Óðurinn til gleðinnar).

2. J.S. Bach – Air úr Hljómsveitarsvítu nr. 3.

3. Edvard Grieg – Í höll dofrakonungs.

4. Carl Orff – O fortuna (úr Carmina Burana).

5. Pjotr Tsjajkovskíj: Píanókonsert nr. 1, 1. kafli.

6. Maurice Ravel – Bolero.

7. Johannes Brahms – Ungverskur dans nr. 5.

8. Antonio Vivaldi – Vorið, 1. kafli.

9. Richard Wagner – Valkyrjureiðin.