Menningarnótt 2016 verður sett í Grjótaþorpinu á morgun, laugardaginn 20. ágúst kl. 12.30. Borgarstjóri, Dagur B. Eggertsson setur hátíðina í Álfasteinsgarði Grjótaþorps við lúðrablástur tónleikasveitar frá Þýskalandi.
Í framhaldinu verður gengið eftir Mjóstræti, þar sem innsetning hljóðs og myndar birtist í húsagluggum. Stefnan verður síðan sett á veitingastaðinn Stofuna við Vesturgötu 3, þar sem viðamikil ljósmyndasýning Jónu Þorvaldsdóttur verður opnuð undir yfirskriftinni, Grjótaþorp – Hjarta Reykjavíkur.
Þetta kemur fram í tilkynningu frá Reykjavíkurborg. Hugmyndasmiður og listrænn stjórnandi opnunaratriðsins er Sverrir Guðjónsson. Eftir setningu Menningarnætur tekur við afar fjölbreytt dagskrá með hátt í 300 ókeypis viðburðum um alla miðborgina.
Margir af stærstu skipuleggjendum viðburða á Menningarnótt fagna stórafmæli í ár og eru af því tilefni með afar veglega dagskrá. Reykjavíkurborg er 230 ára og Ísafjarðarbær sem er gestasveitarfélag Menningarnætur í ár er 150 ára.
Af því tilefni verða Ísfirðingar með viðburði í Ráðhúsinu og helstu tónlistarmenn Ísafjarðar koma fram í lokaatriði Tónaflóðs Rásar 2. RÚV fagnar fimmtíu ára afmæli í ár og Bylgjan verður þrjátíu ára.
Tónaflóð Rásar tvö á Arnarhóli og garðpartý Bylgjunnar í Hljómskálagarðinum eru því sérlega glæsileg í ár. Harpa er fimm ára í ár og verður með mikla dagskrá í tilefni af því. Grandasvæðið er áherslusvæði Menningarnætur í ár og þar verður fjöldi áhugaverðra og óvæntra viðburða í boði og áhersla lögð á að fólk komist vel leiðar sinnar. Dagskrá og nánari upplýsingar eru á www.menningarnott.is.