Eignast útgáfurétt á allri tónlist Senu
Á blaðamannafundi á miðvikudag tilkynntu tónlistarmennirnir Ólafur Arnalds og Sölvi Blöndal um stofnun nýs útgáfufyrirtækis sem mun taka yfir allan tónlistarrekstur Senu, stærstu plötuútgáfu landsins um árabil. Fyrirtækið mun einbeita sér að nýrri útgáfu en mun einnig halda utan um og endurútgefa þá tónlist sem Sena á réttinn á, sem er allt að 80 prósent af útgefinni tónlist á Íslandi.
Sölvi, sem gerði garðinn frægan með rappsveitinni Quarashi, og Ólafur, sem hefur meðal annars hlotið BAFTA-verðlaunin fyrir tónlist sína,eru í forsvari fyrir fyrirtækið, en aðrir hluthafar eru Jón Diðrik Jónsson, meirihlutaeigandi Senu, Sigurjón Sighvatsson, kvikmyndaframleiðandi og athafnamaður, Reynir Harðarson, fjárfestir og einn af stofnendum CCP, og Henrik Biering tónlistarmaður.
Tónlistarmennirnir segjast ekki telja að svartsýnisspár um endalok tónleikaútgáfu gangi eftir þrátt fyrir minnkandi plötusölu á undanförnum árum, en stefnt er á að færa útgáfuna inn í nútímann með aukinni stafrænni útgáfu og auknu aðgengi að eldra efni á netinu.
Þó að Sena dragi sig úr tónlistarbransanum verður fyrirtækið ennþá virkt í útgáfu á annars konar afþreyingarefni og viðburðastjórnun.