Jennifer Aniston fékk heiðursverðlaun á Giffoni kvikmyndahátíðinni á Ítalíu. Hátíðin er stærsta kvikmyndahátíð í Evrópu sem haldin er fyrir ungmenni. Aniston sat fyrir svörum og olli ungum aðdáendum sínum ekki vonbrigðum. Hún hvatti ungt fólk til að skrifa kvikmyndahandrit þar sem konur væru fyrirferðarmiklar. Hún gagnrýndi hversu upptekið fólk væri á netmiðlum og sagði að nauðsynlegt væri að taka sér frí frá þessum miðlum og tala saman. Aniston tók svo harða afstöðu gegn einelti og vandaði nettröllunum alræmdu ekki kveðjurnar: „Þeir eru huglausir og nafnlausir og fela sig á bak við tölvurnar sínar.“

Aniston sást fella tár þegar ung stúlka spurði feimnislega hvort hún vaknaði stundum á morgnana og vissi ekki hver hún væri. Leikkonan sagði að það hefði oft hent sig. Allir upplifðu einhvern tímann vanlíðan og fyndist að þeir gætu ekki tekist á við erfiðleikana sem þeir stæðu frammi fyrir. Hún sagði að frægt fólk upplifði þetta að sjálfsögðu einnig því það væri bara eins og annað fólk.

Leikkonan þótti standa sig frábærlega, var einlæg og hlýleg í viðmóti, og heillaði unga fólkið.