Egill Sæbjörnsson sýnir fyrir hönd Íslands á Feneyjartvíæringnum 2017
Listamaðurinn Egill Sæbjörnsson fer fyrir hönd Íslands á frægustu myndlistarhátíð heims, Feneyjartvíæringinn, þegar hún verður haldin í 57. skipti á næsta ári. Hin þýska Stephanie Böttcher verður sýningarstjóri íslenska skálans sem verður á eyjunni Giudecca syðst í borginni. Þetta var tilkynnt á blaðamannafundi í Kynningarmiðstöð íslenskrar myndlistar (KÍM) rétt í þessu.
Egill Sæbjörnsson er fæddur árið 1973 í Reykjavík og byrjaði að sýna list sína opinberlega á fyrri hluta tíunda áratugarins. Hann stundaði nám við Myndlistar- og handíðaskólann og háskólann í París – St.Denis. Frá árinu 1998 hefur hann verið búsettur í Berlín en haldið einkasýningar og sýnt verk sín víða um heim.
Egill hefur fengist við myndlist, myndbands-innsetningar, gjörningalist, auk þess að njóta nokkurra vinsælda fyrir popptónlist sína – sem hefur toppað íslenska vinsældalista og fengið góða spilun á tónlistarstöðinni MTV.
„Ég rosalega ánægður, spenntur fyrir þessu verkefni og tilbúinn að takast á við það,“ segir Egill í samtali við DV, en spjallað verður ítarlegar við listamanninn, og fjallað um tvíæringinn í helgarblaði DV sem kemur út á morgun.
1. Listamenn og sýningarstjórar sendu inn tillögur að verkum.29 tillögur bárust.
2. Fagráð valdi þrjú verkefni til frekari útfærslu.Verkefni Egils Sæbjörnssonar, Gjörningaklúbbsins og Margrétar Blöndal urðu fyrir valinu.
3. Þessir listamenn og sýningarstjórar þeirra unnu áfram að verkefnum sínum.Hver hópur fékk sex vikur og 250 þúsund krónur til að koma verkefninu á framkvæmdastig.
4. Fagráð valdi framlag Íslands til tvíæringsins úr tillögunum þremur.Fagráðið KÍM er skipað Björgu Stefánsdóttur, framkvæmdastjóra KÍM, Hlyni Hallssyni, safnstjóra Listasafnsins á Akureyri, og Sirru Sigrúnu Sigurðardóttur listamanni. Gestir nefndarinnar voru Aðalheiður Guðmundsdóttir, listheimspekingur og fagstjóri fræðigreina í myndlistadeild Listaháskóla Íslands, og Libia Castro myndlistarmaður.
