„Við biðjum alla gesti okkar sem urðu fyrir óþægindum afsökunar“
Forsvarsmenn tónlistarhátíðarinnar Secret Solstice hafa beðist afsökunar á töfum sem urðu við að koma gestum inn í Laugardalshöll til að sjá Radiohead. Þá voru tónleikar Die Antwoord færðir inn í hús og komust færri að en vildu.
Í yfirlýsingu sem forsvarsmenn hátíðarinnar sendu í morgun kemur fram að margar athugasemdir hafi borist síðustu daga. „Takk fyrir þær. Það er margt sem fór vel en annað sem betur hefði mátt fara,“ segir meðal annars.
„Á risastórri hátíð með þúsundum gesta má alltaf reikna með að upp komi atvik sem ekki er unnt að sjá fyrir. Það gerðist því miður um helgina. Við biðjum alla gesti okkar sem urðu fyrir óþægindum afsökunar. Það á til dæmis við um tafirnar við að koma gestum inn í Laugardalshöll til að sjá Radiohead. Það tók of langan tíma. Allir gestir voru hins vegar komnir inn 50 mínútum áður en tónleikunum lauk. Einnig kom okkur í opna skjöldu sú krafa Radiohead að leyfa engar bjórdósir í Höllinni en gæslumaður frá hljómsveitinni fylgdi þeirri kröfu fast eftir,“ segir í yfirlýsingunni. Þar segir að Radiohead hafi gert kröfu um að spila innandyra og þess vegna hafi tónleikarnir verið í Laugardalshöllinni.
„Ófyrirséðar tafir í millilandaflugi við komu tónlistarmanna til landsins á sunnudag voru okkur mikil vonbrigði. Við stóðum frammi fyrir tveimur vondum kostum vegna Die Antwoord, að aflýsa tónleikunum eða færa þá inn í hús (Hel). Við tókum síðari kostinn þótt við gerðum okkur strax fulla grein fyrir að því að færri kæmust að en vildu. En það er líka ástæða til að hrósa starfsfólki okkar og sjálfboðaliðum. Þeir unnu algjört þrekvirki að ná því að setja upp tónleikana með svona stuttum fyrirvara. Það er þekkt fyrirbæri á tónlistarhátíðum bæði hér heima og erlendis að færri komast að en vilja á einstaka viðburði. Við því er ekkert að segja,“ segir í yfirlýsingunni.
„Við erum gríðarlega stolt af því sem við höfum gert á aðeins þremur árum. Við munum halda ótrauð áfram og skipuleggja glæsilega Secret Solstice hátíð að ári,“ segir að lokum.