Aðeins þrjú af 89 lærdómsritum Bókmenntafélagsins eru eftir konur
Um þessar mundir fagnar Hið íslenska bókmenntafélag 200 ára afmæli, meðal annars með sýningu í Þjóðarbókhlöðunni.
Í umræðuhópnum „Bækur sem þarf að þýða“ á Facebook kallaði Soffía Auður Birgisdóttir, bókmenntafræðingur, eftir því að félagið stigi inn í nútíðina og myndi þýða fleiri heimspeki- og fræðirit eftir konur og gefa út í Lærdómsritaröð Bókmenntafélagsins.
89 bækur hafa komið út í hinni virtu og vinsælu Lærdómsritaröð frá árinu 1970 en aðeins þrjár af þeim eru eftir konur. Sú fyrsta, Um sársauka annarra eftir Susan Sontag, kom ekki út fyrr en árið 2006.
Síðar í umræðunum bregst Eyja Margrét Brynjarsdóttir, heimspekingur og núverandi ritstjóri Lærdómsritraðarinnar, við ábendingunni. Hún segir að vonandi muni kynjahlutföllin skána á næstu árum enda sé yfirlýst markmið núverandi ritstjóra að gefa út að minnsta kosti jafnmargar bækur eftir konur og karla. Hins vegar séu mjög fáir þýðendur sem leiti til ritstjórans með verk eftir konur. „Það er því miður afskaplega sjaldan sem einhver tekur það upp hjá sjálfum sér að leita til okkar með efni eftir konur, það gerist alveg ótrúlega sjaldan,“ skrifar Eyja Margrét.
Í samtali við DV segir Eyja Margrét að nokkrar bækur eftir konur séu í pípunum hjá félaginu og stefnt sé á að einhver lærdómsrit eftir konur muni koma út í ár og á næstu árum.