Höfundur: Bryndís Loftsdóttir.
–
Made in Children er frumsamið verk sem sýnt er á litla sviði Borgarleikhússins. Þetta er eitt af samstarfsverkefnum Borgarleikhússins og Sjálfstæðu leikhúsanna og sannarlega ástæða til þess að lofa þá samvinnu og hvetja til áframhalds, jafnvel þótt maður hoppi ekki hæð sína í loft upp yfir þessari sýningu.
Tíu börn fara með öll hlutverkin í Made in Children en að sögn aðstandenda er sýningin þó ekki ætluð börnum. Í leikskrá segir um verkið „Made in Children er á mörkum mikils vonleysis og öfgafullrar bjartsýni og er börnunum gefinn laus taumur og þau send af stað í leit að háleitu siðferði, djúpstæðum innri frið og betri framtíð.“
Hátt yfir sviðinu, var kastað upp fjölmörgum setningum tengdum fyrirsjáanlegum hugtökum úr þröngsýnum hugmyndaheimi höfunda.
Uppbygging handrits er engin, varla að merkja megi tengingar, fléttur eða ris. Börnin skiptast á mislöngum ræðum þar sem þau segja til um framtíð hvert annars. „Þú munt gera þetta og þú munt gera hitt.“ Þess á milli spila þau á hljóðfæri, öskra, líkja eftir hreyfingum úr forngrísku leikhúsi með tálguðum stöfum og þjóta um sviðið hulin gráum lökum. Jafnvel húmorinn í verkinu er slappur. Hátt yfir sviðinu, var kastað upp fjölmörgum setningum tengdum fyrirsjáanlegum hugtökum úr þröngsýnum hugmyndaheimi höfunda. Þessi texti var alla jafna algjörlega úr tengslum við það sem börnin voru að gera. Erfitt var auk þess að fylgjast með öllu sem þar var varpað fram. Líta þurfti upp af sviðinu til að lesa textann og þá hætti manni við að missa áhersluorð úr ræðum barnanna sem stóðu misjafnlega vel að vígi hvað framsögn varðar.
Börnin voru öll klædd í falleg og mjög litskrúðug föt sem ég get nokkurn veginn fullyrt að tilheyrðu flest rándýrum merkjum sem fæstir foreldrar hafa efni á að kaupa fyrir börn sín til daglegra nota. Mynstur og litir lífguðu mjög upp á sviðið og sköpuðu örlitla spennu við pólitískan tón verksins en styrktu því miður líka þá mynd af hópnum að þau ættu öll eins bakgrunn og deildu sömu skoðunum.
Sé sýningin ætluð fullorðnum leikhúsgestum, þá hlýtur hún fyrst og fremst að gleðja aðstandendur þeirra barna sem þátt taka. Rétt eins og aðrar sýningar sem unnar eru með okkar flottu og hæfileikaríku börnum í öllum grunnskólum landsins.
Það er ekki réttlát að bera flutning verksins saman við sýningar fullþjálfaðra leikara og því vík ég mér undan því að gefa sýningunni stjörnur.
