Warpaint, Minor Victories og Kate Tempest á Iceland Airwaves
Bandaríska indírokksveitin Warpaint, breski rapparinn Kate Tempest og breska skógláps-súpergrúppan Minor Victories eru meðal fjörtíu listamanna sem koma fram á Iceland Airwaves tónlistarhátíðinni 2. til 6. nóvember næstkomandi.
Aðrir erlendir listamenn sem tilkynnt var í myndbandstilkynningu í lok síðustu viku að kæmu fram á hátíðinni eru The Sonics (BNA), Hannah Lou Clark (Bre), Dolores Haze (Sví), Liima (Dan), This is the kit (Bre), Fews (Sví/BNA), Silvana Imam (Sví), Jennylee (BNA), The Ills (Slk), Unge Ferrari (Nor), Torres (BNA), Emil Stabil (Den). Einnig var stór hópur íslenskra listamanna staðfestur á dagskrána, meðal annars Samaris, Vök, Emmsjé Gauti, Úlfur Úlfur, Hildur, HórMónar, Singapore Sling og Agent Fresco.
Áður hefur verið greint frá því að breska rokkgoðsögnin PJ Harvey muni spila á lokatónleikum hátíðarinnar, sem fara fram í Valsheimilinu sunnudagskvöldið 6. nóvember. Þá hefur verið greint frá því að Múm muni spila ásamt bandaríska strengjakvartettinum Kronos í Eldborgarsal Hörpu á föstudagskvöldinu, en hátíðargestir munu geta sótt sér ókeypis sérmiða á tónleikana fyrr um daginn.