Íshúsið Í Íshúsi Hafnarfjarðar að Strandgötu 90 eru 28 vinnustofur og verkstæði hönnuða, listamanna og handverksfólks.

Mikil gróska er í lista- og menningarlífi Hafnfirðinga og krafturinn endurspeglast vel í viðburðinum Gakktu í bæinn sem fer fram í dag, föstudag, milli klukkan 17 og 22. Þá opna listamenn, hönnuðir og handverksfólk vítt og breitt um bæinn vinnustofur sínar og bjóða gesti og gangandi, bæjarbúa jafnt sem nærsveitamenn, velkomna í heimsókn. Menningarmiðstöðin Hafnarborg og Byggðasafn Hafnarfjarðar láta heldur ekki sitt eftir liggja og hafa opið fram á kvöld.

Gamla prentsmiðjan Vinnustofusalurinn í gömlu prentsmiðjunni að Suðurgötu 18.

Meðal þátttakenda eru hönnuðir og handverksfólk í Íshúsi Hafnarfjarðar, þar sem eru 28 vinnustofur og verkstæði í ólíkum skapandi greinum. Starfið fer fram í gömlu og fallegu fyrrverandi frystihúsi við smábátahöfnina og má segja að það sé ákveðið kennileiti í bænum. Vinnurýmin eru langflest mjög opin og stuðla að samtali og samvinnu manna á milli enda hefur myndast afar skemmtilegt samfélag í Íshúsinu. Flóran er einnig afar fjölbreytt. Í húsinu má meðal annars finna keramikhönnuði, hnífasmið, nokkur vöruhönnunarfyrirtæki, tréskipasmið og textílhönnuði.

Steinsnar frá Íshúsinu eru gömlu verbúðirnar, Fornubúðir, þar sem einnig er afar kröftug starfsemi. Þar má meðal annars heimsækja sjö leirlistakonur í Gáru handverki, kíkja inn til myndlistarkonunnar Soffíu Sæmundsdóttur og reka inn nefið í Gallerý Múkka.

Meðal annarra þátttakenda í Gakktu í bæinn eru sjö listamenn sem starfað hafa um árabil í Gömlu Prentsmiðjunni að Suðurgötu 18 og Elín Guðmundsdóttir sem opnar leirlistastofu sína að Suðurgötu 49. Einnig er forvitnilegt að leggja leið sína í Dvergshúsið við Lækjargötu þar sem fjórir myndlistarmenn mála meðal annars með olíulitum, akrýl og vatnslitum. Þar má líka finna Rimmugýgi sem sýnir handverk og vopn að hætti víkinga.

Tilvalið er að rölta á milli staða og njóta þess sem hönnuðir og listamenn hafa að bjóða í Firðinum fagra.

Dvergshúsið, gengið inn frá Brekkugötu
Jórunn, Helgi, Lovísa og María Aldís mála í olíu, akrýl, vatnslitum og fleiru. Heitt á könnunni.

Gallerý Múkki, Fornubúðum 8
Aðalheiður Skarphéðinsdóttir sýnir verk sín.

Íshús Hafnarfjarðar, Strandgötu 90
28 vinnustofur hönnuða, listafólks og handverksfólks. Fjölbreytt starfsemi, m.a. textíll, keramik, vöruhönnun, myndlist og trésmíði. Myndlistarsýning Rósu Sigurbergsdóttur í gamla Tækjasalnum og Pop-up kaffihús Íshússins.

Rimmugýgur í Dvergshúsinu
Félagar sýna handverk og vopn.

Gamla Prentsmiðjan, Suðurgötu 18
Í húsinu eru 7 listamenn, hver með sína sérstöðu. Ásdís Sæmundsdóttir, Helga Björnsdóttir, Ingrún Ingólfsdóttir, Margrét Kristjánsdóttir, Matthildur Jóhannsdóttir, Ragnhildur Steinbach og Sif Guðmundsdóttir.

Dvergshúsið, gengið inn frá Brekkugötu
Opin vinnustofa hjá listamanninum og hönnuðinum Alice Olivia Clarke.

Gára handverk, Fornubúðum 8
Fallegir handmótaðir leirmunir.

Soffía Sæmundsdóttir, Fornubúðum 8
Ný málverk á veggjum á vinnustofu Soffíu og leyniskúffurnar opnar uppi. Sumartilboð á öllum gulum kortum og myndum. Léttar veitingar.

Elín Guðmundsdóttir, Suðurgötu 49
Kindarlegt keramik og laglegir leirmunir. Léttar veitingar og allir hjartanlega velkomnir.

Pakkhús og Sívertsens-hús Byggðasafnsins
Ókeypis aðgangur. Í Pakkhúsinu má meðal annars sjá þemasýninguna Bíóbærinn, gullöld kvikmyndahúsanna í Hafnarfirði sem unnin var í samvinnu við Kvikmyndasafn Íslands.

Hafnarborg
Klukkan 20 verður í boði leiðsögn um sýningu Hugsteypunnar, Umgerð, og sýningu á grafíkverkum úr safneign.

Gakktu í bæinn Kort þar sem sjá má staðetningu þeirra sem taka þátt í viðburðinum Gakktu í bæinn.