„Kauðskur kallahúmorinn minna sterklega á sögurnar um Stellu Blómkvist“
Í dag birtist bókagagnrýni eftir Friðriku Benónýsdóttur á Vísi um nýja glæpasögu sem ber heitið Verjandinn eftir Óskar Magnússonar fyrrverandi útgefanda Morgunblaðsins.
Verjandinn fyrsta bók Óskars og fjallar sagan um lögmanninn Stefán Bjarnason. Friðrika gefur bókinni tvær stjörnur af fimm í bókadómnum.
Það sem vakið hefur mesta athygli í dómnum er kenning Friðriku um að Óskar gæti allt eins verið rithöfundurinn dularfulli Stella Blómkvist.
Í dómnum segir Friðrika meðal annars:
„Í forgrunni er verjandinn sem bókin dregur nafn sitt af, Stefán Bjarnason, en sú persóna er heldur ekki skýrum dráttum dregin, enda snýst sagan af honum mest um kvennafar með aðskiljanlegustu konum og færnin sem málafærslumaður er greinilega algjört aukaatriði. Öll sú saga og ekki síður málfarið og kauðskur kallahúmorinn minna sterklega á sögurnar um Stellu Blómkvist og óneitanlega vaknar sú spurning hvort Óskar sé höfundur þeirra bóka líka. Það skyldi þó aldrei vera.“
Stella Blómkvist hefur farið huldu höfði árum saman og með reglulegu millibili koma upp ýmsar tilgátur um hver hún raunverulega er. Þá hafa Davíð Oddsson, Guðbergur Bergsson, Árni Þórarinsson, Auður Haralds og Stefán Jón Hafstein verið nefnd sem hin raunverulega Stella Blómkvist.