Kvikmyndin La La Land með þeim Ryan Gosling og Emmu Stone í aðalhlutverki fékk sjö tilnefningar til Golden Globe-verðlaunanna, en tilnefningarnar voru tilkynntar í dag. Myndin, sem verður frumsýnd hér á landi þann 27. janúar, hefur fengið einróma lof gagnrýnenda og þykir líkleg til afreka á Óskarsverðlaunahátíðinni á næsta ári.
Myndin er tilnefnd sem besta myndin í flokki gaman- og söngvamynda en auk þess eru myndirnar 20th Century Women, Deadpool, Sing Street og Florence Foster Jenkins tilnefndar í sama flokki. Þá er Emma Stone tilnefnd sem besta leikkonan í aðalhlutverki í sama flokki auk Annette Bening (20th Century Women), Meryl Streep (Florence Foster Jenkins), Hailee Steinfeld (The Edge of Seventeen) og Lily Collins (Rules Don‘t Apply).
Ryan Gosling er tilnefndur sem besti karlleikarinn ásamt Jonah Hill (War Dogs), Colin Farrell (The Lobster), Ryan Reynolds (Deadpool) og Hugh Grant (Florence Foster Jenkins).
Sjónvarpsþættirnir Westworld eru tilnefndir til þriggja verðlauna, þar á meðal sem besti dramaþátturinn og þá er Evan Rachel Wood tilnefnd sem besta leikkonan í aðahlutverki í flokki dramaþátta og Thandie Newton sem besta leikkonan í aukahlutverki.