Sonur Malcolms McLaren og Vivienne Westwood brennir minjagripi fyrir 600 milljónir
Um helgina brenndi nærfatahönnuðurinn Joe Corré, sonur guðforeldra pönksins, Malcolms McLaren og Vivienne Westwood, minjagripi tengda upphafsárum pönksins, sem metnir höfðu verið á tæplega 600 milljónir króna. Meðal þeirra minja sem brunnu voru sjaldgæfar demóupptökur, föt úr pönkbúðinni SEX, Sid Vicious-dúkka og buxur af Johnny Rotten.
Brennan, sem átti sér stað á 40 ára útgáfuafmæli lagsins Anarchy in the UK með Sex Pistols, var haldin til að mótmæla sýningunni Punk London sem nokkrar helstu menningarstofnanir borgarinnar standa fyrir í tilefni afmælisins. Corré sigldi á bát út á ána Thames með minjagripi, pólitísk slagorð og brúður sem minntu á helstu stjórnmálamenn Bretlands um þessar mundir og kveikti í.
Í stuttri ræðu sem Corré hélt áður en hann kveikti í bátnum sagði hann að pönk hafi boðið upp á útgönguleið fyrir kynslóð sem eygði enga framtíð: „Pönk átti aldrei að snúast um nostalgíu,“ sagði Corré.