Um 42 árum eftir að Hið íslenska bókmenntafélag réðst í útgáfu heillegrar Íslandssögu fyrir almenning kemur loks út síðasta bindið í ritröðinni. Verkefnið hófst á 1000 ára afmæli byggðar árið 1974, en þá var ákveðið að gefa út sögu Íslands við almennings hæfi frá upphafi byggðar og til vorra daga. Ellefta og síðasta bindið í Sögu Íslands fjallar um árin 1918–2008 og kemur í búðir í vikunni.

Sigurður Líndal Hefur ritstýrt ellefu bindum af Sögu Íslands á 42 árum.

Bindið hefst árið sem Ísland varð sjálfstætt ríki og lýkur í ársbyrjun 2009, þegar bankahrun og búsáhaldabylting skóku íslenskt samfélag. Samkvæmt tilkynningu frá Bókmenntafélaginu er dregin upp mynd af „mannlífi og menningu í samfélagi sem var eitt hið fátækasta í Vestur-Evrópu en var um miðbik 20. aldar komið í hóp þeirra efnuðustu og hélt þeirri stöðu fram á 21. öld þótt ýmiss konar áföll riðu yfir þjóðina. Þá er greint frá sögu íslensks réttarfars á 20. öld og jafnframt dregnir upp meginþræðir íslensks menningarlífs og sjónum einkum beint að undirstöðum listsköpunar. Þetta eru miklir umbrotatímar í sögu þjóðarinnar sem veita jafnframt mikilvæga innsýn í helstu átakamál og viðfangsefni samtímans.“

Höfundar efnis eru Jón Karl Helgason, Pétur Hrafn Árnason og Sigurður Líndal og ritstjórar eru þeir Pétur Hrafn og Sigurður, en hann hefur stýrt útgáfunni frá upphafi.