Víðast hvar í heiminum berjast hefðbundin dagblöð í bökkum. Það sem lendir fyrst undir niðurskurðarhnífnum er oftar en ekki menningarumfjöllun og listgagnrýni.

Í Bandaríkjunum hafa unnendur klassískrar tónlistar verið sérstaklega uggandi um þróunina og talið hana koma mjög illa við þetta svið menningar. Til þess að bregðast við þessu hefur dagblaðið The Boston Globe blásið til nýs tilraunaverkefnis þar sem nokkur samtök sem ekki eru rekin í gróðaskyni eru fengin til að leggja í púkkið svo hægt sé að halda úti tónlistargagnrýni.

The San Francisco Conservatory of Music, the Rubin Institute for Music Criticism, og Ann and Gordon Getty Foundation munu aðstoða fjölmiðilinn við að greiða tónlistargagnrýnandanum Zoë Madonna laun í tíu mánuði. Samkvæmt frétt New York Times um málið er slíkt fyrirkomulag, þar sem samtök hjálpa til við að greiða fyrir ákveðna gerð blaðamennsku, að verða æ algengara í bandarískum fjölmiðlum.

Gagnrýnisraddir hafa hins vegar heyrst varðandi tilraun Boston Globe þar sem samtökin sem taka þátt í verkefninu munu vafalaust tengjast einhverjum þeirra viðburða sem Madonna mun meta og gagnrýna. Til dæmis mun hún líklega þurfa að gagnrýna tónleika þar sem kennarar eða starfsmenn við San Francisco Consvervatory of Music munu leika.