Von er á fyrstu bókunum frá hinni nýstofnuðu bókaútgáfu Benedikt í lok mánaðarins, en forlagið mun gefa út að minnsta kosti fjórar bækur nú fyrir jólin. Benedikt er ný bókaútgáfa stofnuð af Guðrúnu Vilmundardóttur, fyrrverandi útgáfustjóra Bjarts, en hún sagði starfi sínu lausu í sumar eftir tíu ára starf hjá fyrirtækinu.

Guðrún segir það ganga alveg ljómandi vel að koma nýju útgáfunni á fót. „Það eru mörg handtök sem fylgja því að opna svona nýtt apparat, en ég vinn þau bara eitt af öðru og þetta gengur alveg ljómandi vel,“ segir Guðrún í samtali við DV.

Aðspurð um nafnið segir Guðrún að hún hafi viljað velja útgáfunni fallegt og hlýlegt mannsnafn. „Benedikt þýðir hinn blessaði. Þetta er alþjóðlegt og fallegt nafn sem mér þykir vænt um,“ útskýrir hún.

Helsta markmið útgáfunnar er einfalt: að gefa út fyrsta flokks bækur, en hugmyndin er að gera það með áherslu á persónulega þjónustu frekar en færibandaframleiðslu. „Skrifstofan er lítil og heimilisleg en svo útvistum við allrahanda verkefnum. Við viljum hafa þetta smátt og viðráðanlegt, svo við getum haldið utan um hvert og eitt verkefni. Færibandavinna hefur margt til síns ágætis – sérstaklega við framleiðslu á bílum, skilst mér – en ég vil forðast hana í lengstu lög í útgáfunni.“

Fyrstu fjórar bækurnar frá Benedikt eru nú þegar farnar í prentun og verða komnar í íslenskar bókabúðir í lok október og byrjun nóvember. Þetta eru Ör, ný skáldsaga eftir Auði Övu Ólafsdóttur, Eyland, sem er fyrsta skáldsaga Sigríðar Hagalín Björnsdóttur, Takk fyrir að láta mig vita, smásagnasafn eftir sviðslistamanninn Friðgeir Einarsson, og Óvissustig, ný ljóðabók eftir Þórdísi Gísladóttur.