„Ég hef hringt og sent tölvupósta til nánustu samstarfsmanna hans“
Fjórir dagar eru síðan tilkynnt var að Bob Dylan hlyti Nóbelsverðlaunin í bókmenntum árið 2016.
Sænsku akademíunni sem sér um valið hefur hins vegar ekki enn tekist að ná í söngvaskáldið, hann svarar hvorki símtölum né tölvupóstum frá Söru Danius, aðalritara akademíunnar, og hefur ekkert gefið upp um hvort hann muni mæta og taka við verðlaununum þegar þau verða afhent þann 10. desember næstkomandi.
Kvöldið eftir að tilkynnt var um val akademíunnar spilaði Dylan á tónleikum í Las Vegas í Bandaríkjunum en þar nefndi hann ekki þennan mikla heiður.
„Þessa stundina erum við ekkert að vinna í þessu. Ég hef hringt og sent tölvupósta til nánustu samstarfsmanna hans og bara fengið mjög vinsamleg viðbrögð,“ sagði Danius í viðtali við sænska útvarpið í dag. „Ég hef engar áhyggjur af þessu. Ég held að hann muni mæta,“ sagði hún, en bætti svo við: „Annaðhvort kemur hann eða ekki. Hvernig sem fer verður þetta stórt partý til heiðurs honum.“
Lestu umfjöllun DV um Nóbelsverðlaunahafann Bob Dylan:
Tímarnir eru a-breytast ♪♫ ♬