Izzy Young lofsyngur Bob Dylan
„Hann hefði átt að fá verðlaunin fyrir 30 til 40 árum. Hann veit hvað hann er að segja, sér hvað er að gerast í kringum hann og hann er fjári, fjári góður með orð,“ segir Izzy Young um félaga sinn, tónlistarmanninn Bob Dylan sem hlaut Nóbelsverðlaun í bókmenntum í morgun.
Segja má að Izzy sé ein af ástæðum þess að Bob Dylan er það sem hann er í dag. Izzy, sem er 88 ára, rak á sínum tíma plötuverslun, Folklore Center í New York, en þar var Dylan tíður gestur í upphafi sjöunda áratugar liðinnar aldar.
Ágætur kunningsskapur tókst á með þeim Izzy og Dylan og fór svo að Dylan lét hann hafa þrjú lög sem hann hafði samið til að hlusta á. Izzy var stjórnandi vinsæls útvarpsþáttar í New York á þessum tíma og spilaði hann lögin eftir Dylan í þætti sínum.
Það var svo árið 1961 að Izzy skipulagði fyrstu alvöru tónleika Dylans í Carnegie Chapter Hall þann 4. nóvember það ár. Hjólin á mögnuðum ferli Dylans fóru að snúast eftir þetta og árið 1962 gaf hann út sína fyrstu plötu, Bob Dylan.
Izzy fluttist til Svíþjóðar árið 1973 þar sem hann hefur búið allar götur síðan. The Local í Svíþjóð hitti Izzy í dag og spurði hann út í nýjasta Nóbelsverðlaunahafann í bókmenntum. Myndbandið má sjá hér að neðan: