„Kvikmyndagerð sem á sér ekki fordæmi“

Þriðja mynd leikstjórans Christophers Nolans um Batman fær glimrandi dóma frá breska tímaritinu Empire. Dark Knight Rises gerist átta árum eftir atburðina í annarri myndinni. Grímuklæddi brjálæðingurinn Bane ógnar íbúum Gotham í þessari þriðju mynd og ákveður Bruce Wayne að leðurblökumaðurinn verði að snúa aftur.

„Þetta er kvikmyndagerð sem á sér ekki fordæmi,“ segir í dómi Empire. „Þriðja myndin kemur kannski ekki á óvart líkt og fyrsta myndin né býr yfir jafn mikilli óreiðu og önnur myndin, en hún bætir það upp með miklum tilfinningum. Þetta er sú grafskrift sem hetjan á skilið,“ segir í dómi Empire.