Eiríkur Örn Norðdahl gerir rafbækur að umtalsefni á bloggi sínu á Smugunni. Hann er ósáttur við að rafbækur, til dæmis Forlagsins, séu seldar með Adobe-afritunarvörn sem er takmörkuð við fimm lestæki og einungis hægt að nota í tækjum sem styðja aflæsingu slíkra varna. Sjálfur á Eiríkur Kindle sem les ekki rafbækur eins og þessar en notast annars við ólæst formatt.

Eiríkur vildi sýna fram á að afritunarvörnin geri ekkert gagn. Allt eins væri hægt að selja þær án varna og peningarnir og vesenið ekki þess virði. Hann setti því í gang skeiðklukku og „krakkaði“ forritið og að hans sögn tók þetta lögbrot sem hann fúslega gengst við aðeins 25 mínútur og 23 sekúndur.