„Kæru vinir. Vegna breytts rekstrarumhverfis höfum við ákveðið að loka tímabundið hjá okkur í hádeginu á Grillmarkaðnum,“ segir í Facebook-færslu hjá veitingastaðnum Grillmarkaðnum í Lækjargötu. Á afmælisdegi bjórsins, 1. mars næstkomandi, verður síðasta hádegið í bili sem opið verður á staðnum. Í tilefni af því verða fimmtíu fyrstu bjórarnir sem pantaðir verða á þrjátíu ára gömlu verði.

Það var Hrefna Rósa Sætran sem opnaði Grillmarkaðinn sumarið 2011 og hefur hann notið vinsælda síðustu ár. Hádegisopnanir taka aftur gildi þegar líða fer að jólum, ef marka má Facebook-færsluna.

„Við munum svo galopna í desember svo desemberhádegisfastakúnnar þurfa engar áhyggjur að hafa. Hreindýraborgarinn verður á sínum stað ásamt jóla smakkinu og öllu því. Við ætlum meira að segja að gera betur í desember og opna líka á laugardögum og sunnudögum í hádeginu.

Þessi breyting gefur okkur meira svigrúm fyrir skemmtilega hluti og við erum á fullu að undirbúa happy hour sem mun taka við af hádeginu en við munum segja ykkur betur frá því á næstu dögum.“