Einn af vinsælustu hópunum á Facebook meðal þeirra sem hafa áhuga á mat er Rate My Plate, eða gefðu disknum mínum einkunn. Eins og nafnið gefur til kynna er þetta vettvangur fyrir fólk til að birta myndir af matnum sínum og spyrja netverja hvað þeim finnist.
Athugasemdirnar eru oft í anda stjörnukokksins Gordons Ramsay, sem er frægur fyrir ljótt orðbragð, en ekkert gat búið meðliminn Carol C undir þá útreið sem hún fékk þegar hún birti mynd af morgunmatnum sínum sem samanstóð af beikoni, eggjum og baunum.
Rúmlega tvö hundruð þúsund athugasemdir hafa verið skrifaðar við færsluna, flestar afar ljótar. Þá hefur færslunni verið deilt rúmlega 21 þúsund sinnum.
„Ó Guð. Það er eins og beikonið hafi verið sett í rifjárn, eggin sett á diskinn með skrúfjárni og baunirnar líta út fyrir að þurfa hlýtt teppi og tebolla. Þetta er ekki leiðin til að nota mat,“ skrifar einn meðlimur.
„Eldaði hún beikonið í handarkrikanum?“ spyr einn, á meðan annar lýsir þessu sem „hatursglæp á disk.“
Þá vísar einn meðlimur í kvikmyndina Birdbox, þar sem aðalsöguhetjurnar eru með bundið fyrir augun, og veltir því fyrir sér hvort Carol hafi eldað þetta blindandi.
„Eina sem er fulleldað er Carol,“ skrifar svo annar meðlimur. Aðrir fara jafnvel lengra og velta fyrir sér hvort Carol hafi eldað matinn í þvottavél eða á milli rasskinnanna.
„Carol, hvernig í andskotanum ert þú ekki dauð?“ bætir annar við.
Sumar athugasemdirnar eru talsvert grófari og geta áhugasamir lesið þær með því að smella á myndina hér fyrir ofan.