Það er ávallt óvænt ánægja að brjóta egg og sjá að tvær rauður eru í því. Þið getið því ímyndað ykkur furðu tvítuga stjórnmálafræðinemans Cameron Etchells þegar hann keypti sér eggjabakka með sex eggjum og öll eggin innihéldu tvær rauður.
„Ég hef aldrei séð tvöfalda eggjarauðu í lífi mínu. Ég og herbergisfélagi minn vorum hissa þegar við brutum fyrsta eggið. Síðan brutum við annað og vorum í áfalli. En sex egg – við erum algjörlega orðlausir,“ segir Cameron í viðtali við The Argus.
Andrés Ingi Jónsson, þingmaður Vinstri grænna, deilir fréttinni á Twitter-síðu sinni og er jafnvel furðu lostnari en Cameron sjálfur
„What a time to be alive,“ skrifar Andrés sem gæti þýtt eitthvað á þessa leið: „Þetta er stórkostlegur tími til að vera á lífi.“
Framleiðandanum og brandarakónginum Ragnari Eyþórssyni finnst þetta hins vegar ekkert merkilegt.
„Pfffft, ég lenti í þessu 1996 og fór ekkert með það í blöðin. 6 tvíblómaegg í 6 eggja bakka. Þetta kemur reglulega upp í samræðum okkar pabba. Ætti ég kannski að tala við blöðin?“
What a time to be alive! https://t.co/qe9syFFqCT
— Andrés Ingi (@andresingi) February 7, 2019
Samkvæmt frétt The Argus eru líkurnar á að brjóta egg með tveimur eggjarauðum einn á móti þúsund. Líkurnar á að tvö slík egg finnist í sama bakk eru einn á móti milljón. Hins vegur eru líkurnar á því að finna sex slík egg einn á móti trilljón. Þetta eru því stórtíðindi.
„Ég er ekki manneskja sem trúir á heppni og ég er ekki trúaður eða hjátrúarfullur. Ég og herbergisfélaginn minn Fhak fögnuðum og hoppuðum af gleði – ég gleymi þessu aldrei,“ segir fyrrnefndur Cameron.
