Kappaksturskappinn Lewis Hamilton er búinn að bæta á sig miklum vöðvamassa að undanförnu og segir í samtali við Mirror að hann hafi borðað það sem hann vildi þegar hann var í fríi frá kappakstri yfir vetrartímann.

„Yfir vetrartímann gat ég borðað það sem ég vildi þannig að ég borðaði pönnukökur og Cheetos,“ segir hann og heldur áfram. „Ég hreyfði mig mikið og það eru kostir og gallar við það þar sem maður keyrir á lítilli orku.“

Hann segist ekki stefna á að stækka mikið meira.

„Ég er ekki að reyna að vera Hulk en það tekur tíma að bæta á sig vöðvum á réttan hátt og það hefur verið frábært að geta borðað stærri skammta. Mér finnst ég vera í mínu besta formi og get lyft þyngri lóðum.“

Þá segist hann hafa prófað alls kyns hreyfingu yfir veturinn.

„Ég hef gert ýmislegt; bardagalistir og aðrar íþróttir sem reyna á mismunandi líkamsparta. Það er sársaukafullt að koma sér aftur af stað á hverju ári. Ég er ekki með þjálfara en í ár hef ég unnið með mismunandi fólki. Ég hef prófað mismunandi hluti og finnst ég sterkari sem aldrei fyrr.“