„Aðdáendur djúpsteikts kjúklings hafa um áratugaskeið reynt og mistekist að endurgera sérstakt og eftirsótt bragð úr leyniuppskrift ofurstans,“ stendur í fréttatilkynningu frá skyndibitarisanum KFC, og vísar í leyniuppskrift Sanders ofursta, stofnanda KFC. Kynnir tilkynning til sögunnar nýjan talsmann keðjunnar, sjálft vélmennið RoboCop.
„Þannig að meira en þrjátíu árum eftir frumraun hans fengum við RoboCop til liðs við okkur og gáfum honum nýja tilskipun – að vernda eintak af leyniuppskriftinni með því að færa hana á stað sem varinn er gegn kjarnorkuárásum. Þannig að ef þú lifir heimsenda af geturðu enn þá gætt þér á djúpsteiktum kjúklingi,“ stendur enn fremur í tilkynningunni.
Hráefnin í djúpsteikta kjúklingnum frá KFC eru meðal best geymdu leyndarmála í heiminum. Eftir að Sanders ofursti bjó fyrst til uppskriftina þá læsti hann hana inni í hvelfingu í höfuðstöðvum KFC í Louisville í Kentucky í Bandaríkjunum. Þessi uppskrift, sem inniheldur 11 mismunandi kryddjurtir, er enn í notkun í dag. Ástæðan fyrir því að enginn hefur náð að svipta hulunni af henni er sú að hráefnin eru pöntuð frá tveimur mismunandi birgjum og blandan síðan útbúin af þriðja aðila. Meira að segja yfirkokkur KFC og forsvarsmenn fyrirtækisins segjast ekki vita uppskriftina.
Þar til núna hefur bara verið eitt afrit af uppskriftinni en samkvæmt KFC hefur dulkóðað stafrænt eintak nú verið sent til Pionen í Hvítu fjöllunum í Stokkhólmi í Svíþjóð, gagnasafns sem leynist í neðanjarðarskýli sem er grafið rúma þrjátíu metra ofan í jörðina.