Trönuberjasafi gæti linað þjáningar kvenna með liðagigt samkvæmt nýrri rannsókn sem framkvæmd var við Londrina-háskóla í Brasilíu.

Konurnar sem tóku þátt í rannsókninni drukku trönuberjasafa í þrjá mánuði með þeim afleiðingum að magn mótefna sem ráðast á ónæmiskerfið og skemma liði lækkaði talsvert. Þegar að konurnar voru spurðar út í einkenni sín eftir þessa þrjá mánuði sögðust þær finna fyrir minni bólgu og að liðirnir væru ekki eins viðkvæmir.

Andoxunarefnin í trönuberjum gætu komið í veg fyrir viðbrögð ónæmiskerfisins sem valda sársauka og stífleika hjá fólki með liðagigt samkvæmt rannsókninni, en sagt er frá niðurstöðum hennar á vef Daily Mail.

„Rannsóknin gefur til kynna að trönuberjasafi dragi úr virkni sjúkdómsins og hafi þar af leiðandi góð áhrif á sjúklinga sem þjást af liðagigt. Hins vegar er þörf á stærri rannsóknum sem ná yfir lengra tímabil til að skoða þessi áhrif og útskýra virknina,“ segja höfundar rannsóknarinnar.

Rannsóknin er smá í smíðum og náði aðeins yfir 41 konu með liðagigt. Fylgst var með þeim í níutíu daga. 23 konur drukku hálfan lítra af trönuberjasafa á dag en átján kvennanna héldu sig við sitt hefðbundna mataræði.