Hamborgari til heiðurs söngkonunni Svölu Björgvinsdóttur verður á matseðli Hamborgarafabrikkunnar frá og með morgundeginum, en í myndbandi á Facebook-síðu staðarins er farið yfir hvernig borgarinn er settur saman.
Í myndbandinu kemur fram að Svala hafi unnið slaginn um klettasalatið, en hún barðist fyrir því að klettasalat yrði sett á borgarann, sem varð raunin.
Í viðtali við DV fyrr í vikunni sagði Svala að hún hefði ekki þurft að hugsa sig tvisvar um þegar þetta tækifæri gafst.
„Sko, Jói á Fabrikkunni hringdi í mig og bað mig um að koma í borgarasamstarf með þeim. Mér fannst það frábært að slá til og vera með. Það eru bara strákar með borgara á matseðlinum og mér fannst frábært að nú væri loksins kona með sinn eigin borgara þarna. Mér finnst maturinn á Fabrikkunni mjög góður og ég elska hamborgara og dýrka franskar þannig að það passaði vel við mig að vera með minn eigin hamborgara,“ sagði Svala. „Ég sagði bara strax já.”
Þá sagðist hún ekki útiloka frekari landvinninga í matarbransanum.
„Já, aldrei að vita, en ég kann ekkert að elda,“ sagði hún og hló. „Ég er alls ekki klár í því en ég er svaka klár að baka og elska kökur og alls konar eftirrétti. Ég væri alveg til í að gera Svölu möffins og allskonar Svölu smákökur og sæta litla eftirrétti.“