Eldri maður á Flórída fór út að ganga með hundana sína fyrir stuttu á meðan sonur hans beið heima eftir pítsu sem var væntanleg. Þegar að faðirinn kom heim réðst sonurinn á föður sinn með pítsu að vopni. Ku hann hafa hent pítsunni í andlit föður síns og haldið honum niðri í stól. Ástæðan virðist vera sú að sonurinn var pirraður yfir því að faðir hans hafi hjálpað til í fæðingunni þegar að sonurinn kom í heiminn.
Lögreglumenn voru kallaðir að heimilinu í Holiday á Flórída samkvæmt frétt WFLA 8 og fundu pítsasneið á stól og ost og sósu úti um allt. Ættingjar föðursins staðfesta frásögn hans um árásina en enn hefur ekki verið skorið úr um af hverju sonurinn var í svona miklu uppnámi út af þátttöku föðurins í fæðingunni.
Í lögregluskýrslu kemur fram að sonurinn hafi ekki sýnt mótþróa við handtökuna og sagðist hann á vettvangi vita að hann þyrfti að fara í fangelsi.