Meghan Markle og Harry prins gengu í það heilaga seinasta vor og nú hefur breski fjölmiðillinn The Sun birt fyrstu myndina af leynilegu ástarhreiðri hjónanna. Um er að ræða fallegt hús út í sveit sem metið er á tæplega fjögur hundruð milljónir króna.
Í grein The Sun kemur fram að hjónin líti á sveitasetrið sem heimili sitt frekar en íbúðina í Kensington-höll. Setrið var allt tekið í gegn árið 2011, en því fylgir uppgerð hlaða þar sem er að finna tvö eldhús og stórt setusvæði með gluggum frá gólfi til þaks.
Ku hjónin hafa haldið fullt af teitum í húsinu og hafa stjörnur á borð við George og Amal Clooney, Serena Williams og maður hennar Alexis Ohanian og hin nýgiftu Priyanka Chopra og Nick Jonas sótt kóngafólkið heim.
„Þetta er dásamlegur staður með frábæru útsýni og einstaklega friðsæll,“ segir ónefndur vinur hjónanna í samtali við The Sun.
Harry og Meghan skrifuðu undir tveggja ára leigusamning snemma á síðasta ári og fluttu inn fyrir brúðkaupið sitt, sem var haldið í maí.