Sprenghlægileg villa á forsíðu Fréttablaðsins í gær vakti gríðarlega athygli. Í blaðinu var fjallað um brúðkaup knattspyrnustjörnunnar Gylfa Þórs Sigurðssonar og unnustu hans, Alexöndru Helgu Ívarsdóttur, sem haldið verður í sumar.
„Gylfi Þór og Alexandra Helga að undirbúa brauðkaup aldarinnar,“ stóð á forsíðunni og vöktu þessi brauðkaup mikla lukku meðal netverja.
Og ég sem var viss um að þau væri í keto. Ákveðinn skellur. #brauðkaup pic.twitter.com/lM66V6eIPh
— Baldvin Bergsson (@baldvinthor) January 8, 2019
Ókey, eru þau sem sagt að taka yfir þrotabú Kornsins? pic.twitter.com/W50ZljBhRs
— Stefán Pálsson (@Stebbip) January 8, 2019
Ó, mér sýndist þetta fyrst vera hundur. pic.twitter.com/pqyRmfIdTE
— Bragi Valdimar (@BragiValdimar) January 8, 2019
Af því tilefni var hringt í stjörnubakarann Jóa Fel á K100 í morgun og hann spurður hvort hann hefði ekki örugglega verið ráðinn í brauðkaup aldarinnar, þar sem hann töfraði fram veitingar í brúðkaupi Hannes Þórs Halldórssonar, liðsfélaga Gylfa í landsliðinu. Jói segist ekki enn hafa fengið boð í herlegheitin.
„Það er nú svolítið í brúðkaupið enn þá,“ segir Jói, vongóður um að fá boð til Ítalíu þar sem brúðkaupið verður haldið. „Ég hlýt að vera boðinn út,“ segir hann og hlær. „Ef þetta er brauðkaup aldarinnar verð ég að mæta á staðinn og baka á staðnum.“
Þá segist Jói ekki hafa skilið að fólk hafi verið að fetta fingur út í fyrirsögn Fréttablaðsins.
„Ég var eini maðurinn í gær sem hélt að þetta væri ekki mistök í Fréttablaðinu,“ segir Jói sem fannst fullkomlega eðlilegt að Gylfi og Alexandra myndu hafa brauðþema í brúðkaupinu.
„Mér fannst þetta eðlilegt. Mér fannst skrýtið að það stæði ekki undir: Jói Fel mætir.“
Eins og áður segir er Jói algjörlega klár að baka brauð fyrir brúðkaupið í sumar, en segist þurfa að dvelja í hálfan mánuð á Ítalíu til að undirbúa sig. Myndi hann til að mynda baka ítalskt Focaccia-brauð og týna ferskar ólífur af trjánum í brauðgerðina.
Viðtalið í heild sinni má hlusta á hér:
