Því miður er það oft þannig að börn eru ekkert sérstaklega hrifin af grænmeti. Einmitt það var uppi á teningnum á heimili Laleh Mohmedi, tveggja barna móður frá Melbourne í Ástralíu, en hún fann sniðuga lausn á þessu vandamáli.

Laleh leggur mikinn metnað í máltíðir fyrir börnin sín og notar grænmeti og ávexti til að búa til ltiríkar og skemmtilegar teiknimyndapersónur sem eru að sjálfsögðu ætar frá A til Ö. Útkoman er stórkostleg eins og meðfylgjandi myndir sýna.

Laleh lætur ekkert stoppa sig og býr til allt frá Pikachu, til Andrésar Andar og Bangsímons. Laleh segir að sonur hennar Jacob sé mikill aðdáandi listaverkanna.

„Hann bara elskar þetta,“ segir hún í viðtali við Metro. „Að sjá viðbrögð hans þegar hann sér það sem ég skapa gerir þetta allt þess virði.·

Þó matarlistaverkin virðist flókin segir Laleh þau í raun mjög einföld í framkvæmd.

„Þetta tekur ekki langan tíma. Þetta snýst allt um undirbúning. Ég tek til dæmis köldu hráefnin til, eins og smáatriði í andliti og klæðnað, á meðan heitu hráefnin, eins og kartöflumúsin og pastasósan, eldast. Þá er ég snögg að setja allt á diskinn.“