Ávallt ríkir eins konar skyndibitastríð á milli hamborgarakeðjanna Burger King og McDonald‘s. Andað hefur köldu á milli þessara tveggja keðja um áratugabil, en nýjasta útspil Burger King er greinilega ætlað að bjóða McDonald‘s birginn.

Burger King hefur sett á markað borgara sem er sláandi líkur einum vinsælastsa borgara á matseðli McDonald‘s, Big Mac. Nýi borgarinn frá Burger King heitir Big King XL, en um er að ræða 225 grömm af grilluðu nautakjöti, ost, lauk, súrar gúrkur, kál, sósu og brauð.

Þetta er ekki í fyrsta sinn sem Burger King reynir að endurgera Big Mac. Big King-samlokan var sett á matseðil til höfuðs stóra Makka, en var tekin af matseðli árið 2017 því samlokan var ekki nógu vinsæl.

Óljóst er hvað Big King XL verður lengi á matseðli en ljóst er að nú á McDonald‘s leik í þessari borgarabaráttu.