Margir standa í þeirri trú að hvers kyns feiti, til dæmis olía eða brætt smjör, megi vel fara í niðurfallið í eldhúsvaskinum þegar verið er að taka til eftir matseld.
Þetta er hins vegar kolrangt ef marka má píparann Doyle James á vefsíðunni Reader‘s Digest. Hann varar fólk við því að hella feiti í niðurfallið þar sem það geti valdið ýmsum vandamálum.
„Þó hún sé heit og vökvakennd eru rörin köld þannig að feitin rennur niður og storknar,“ segir hann í viðtali á vefsíðunni. Þegar þetta gerist er hægara sagt en gert að fjarlægja feitina.
„Þá er mjög, mjög erfitt að losna við feitina því hún festist við rörin.“
James mælir með því að fólk setji feiti í ílát, leyfi henni að kólna eftir eldamennsku og hendi henni síðan í ruslið. Ef um lítið af feiti er að ræða er nóg að þurrka hana af eldunartækjum með pappírsþurrku.