Frægasti auglýsingatími heims er án efa í hléi bandarísku Ofurskálarinnar, eða Super Bowl, úrslitaleiknum í bandarískum fótbolta. Ofurskálin fer fram þann 3. febrúar næstkomandi og bíða margir spenntir eftir bæði leiknum og auglýsingunum.

Sælgætisframleiðandinn Skittles fer heldur betur óhefðbundnar leiðir þegar kemur að Super Bowl-auglýsingu í ár. Í staðinn fyrir að framleiða auglýsingu og sýna hana í beinni útsendingu í auglýsingahléi Ofurskálarinnar ákvaðu forsvarsmenn Skittles að setja í staðinn á svið söngleik á Broadway í New York. Söngleikurinn heitir einfaldlega Skittles Commercial: The Broadway Musical.

Söngleikurinn verður aðeins sýndur einu sinni og taka alls sautján leikarar og hljómsveit þátt í uppfærslunni. Leikararnir hafa ekki verið tilkynntir en samkvæmt upplýsingum frá Skittles eru þetta stjörnur sem hafa leikið í Broadway-sýningum á borð við The Lion King og 42nd Street. Þá mun söngleikurinn varpa upp spurningum um neyslusamfélagið sem við lifum í og auglýsingar.

Þetta er ekki í fyrsta sinn sem Skittles fer óhefðbundnar leiðir þegar kemur að Ofurskálinni. Fyrirtækið vakti gríðarlega athygli fyrir auglýsingu sína í fyrra, þó aðeins ein manneskja hafi fengið að sjá hana. Voru ýmsar vangaveltur um hvernig auglýsingin væri, eins og sjá má hér fyrir neðan.