Leikarinn Rúnar Freyr Gíslason var spurður spjörunum úr á K100 í vikunni um hvað hann hafi vanalega í matinn. Rúnar Freyr sagði í viðtalinu vera ansi lélegur í skipulagningu og gripi oft eitthvað tilbúið með sér heim. Hann var á leiðinni á læknavaktina og gerði ráð fyrir að stoppa í Nóatúni.
„Það er líka hægt að fara eitthvað eins á Búlluna eða Hagavagninn að ná í eitthvað. Það er stundum notað. Svo er Dommarinn stundum tekinn á þriðjudögum,“ segir Rúnar Freyr í meðfylgjandi viðtali. Hulda Bjarna, annar þáttarstjórnandinn, skildi ekkert í þessu viðurnefni.
„Hvað er Dommarinn?“ spyr Hulda og Rúnar Freyr svarar um hæl. „Dommarinn er Dominos.“
Eitt af áramótaheitum leikarans var að minnka eyðslu.
„Ég veit að ég eyði alltof miklu í einhverja vitleysu. Nenni ekki að elda og fer að kaupa eitthvað sem er helmingi dýrara en ef ég hefði gert það sjálfur. Það er ekki að ganga nógu vel á fyrstu metrunum,“ segir Rúnar Freyr og hlær. Það var svo þegar að talið barst að Veganúar sem leikarnir æstust.
„Ég prófaði einu sinni Eldum Rétt Vegan. Ég var alveg að fíla það,“ segir Rúnar Freyr, en hann og kona hans, Guðrún Jóna, eiga mörg börn á ýmsum aldri. „Það var ekki að skora hjá öllum aldurshópum. Þannig að ég hef ekki gert það aftur,“ bætir hann við og segist ætla að prófa að borða vegan aftur þegar að fækka fer í heimili. Logi Bergmann, hinn þáttarstjórnandinn efast um að það muni einhvern tímann gerast. Þá gerir Rúnar Freyr þau bæði kjaftstopp.
„Ég get sagt ykkur það að það er von á öðru,“ segir Rúnar Freyr og við tekur löng þögn.
„Nei, ég er að djóka. Guðrún er komin 2 daga á leið. Ekki segja neinum,“ segir hann og skellihlær sem og Logi og Hulda.
Hlusta má á þetta skemmtilega viðtal hér fyrir neðan: