Pítsa er vinsæll matur og getur verið afskaplega bragðgóð. Nú sýnir ný rannsókn að pítsa virðist einnig búa yfir töframætti.
Sagt er frá því í New York Magazine að í fyrirtæki nokkru hafi verið sendur út póstur til starfsmanna þar sem þeir voru hvattir til að vinna meira þann daginn. Um þrjár tegundir af tölvupóstum var að ræða. Í einum póstinum var starfsfólki lofaður peningabónus fyrir vinnuna, í öðrum var hrósi lofað og í þeim þriðja var því lofað að starfsmenn fengu gjafabréf fyrir ókeypis pítsu.
Í þessari óvísindalegu rannsókn var einfalt að reikna út hvaða tölvupóstur virkaði best því starfið í fyrirtækinu fólst í því að setja saman tölvuflögur. Auðvelt var að rekja meiri afköst til tiltekinna starfsmanna og tengja afköstin við hvaða tölvupóst viðkomandi fékk.
Kom í ljós að það virkaði best að bjóða starfsfólki fría pítsu, þar sem framleiðni hjá þeim hópi jókst um 6,7 prósent á fyrsta degi. Fast á hæla pítsunnar fylgdi hrósið, en hjá þeim hópi jókst framleiðni um 6,6 prósent. Það kemur hins vegar á óvart að framleiðni jókst aðeins um tæp fimm prósent hjá þeim sem var lofað peningagreiðslum fyrir vel unnin störf.
Rannsóknin var í gangi í eina viku og eftir því sem leið á vikuna jókst framleiðni þeirra sem áttu að fá pítsu eða hrós en það dró úr henni hjá þeim hópi sem var lofað peningum.