Eins og áður hefur verið sagt frá hefur leikkonan Meghan Markle haft gríðarlega góð áhrif á mataræði eiginmanns síns, Harry prins, síðan þau gengu í það heilaga í maí í fyrra.
Matarvefurinn hefur til að mynda skrifað um það frétt að Harry sé steinhættur í áfengi þar til Meghan elur þeirra fyrsta barn í vor. Nú segir konunglegi ævisagnaritarinn Andrew Morton að Meghan hafi byrjað að hafa puttana í mataræði prinsins fyrir mörgum árum, strax og þau byrjuðu að stinga saman nefjum.
„Hún elskar að elda, að prófa nýjan mat og að prufa sig áfram með fersk hráefni,“ segir Andrew í samtali við Express og bætir við að hún hafi gjörbreytt því sem til er í ísskáp prinsins.
„Meghan fer aldrei að heiman nema hún eigi hummus, gulrætur, grænan safa, möndlur og chia-búðing í ísskápnum,“ segir Andrew.
Þá hefur Meghan einnig hjálpað Harry að skipta út óhollum drykkjum fyrir vatn og fengið hann með sér í jóga.