Herramennirnir í Brennslunni á FM957 ákváðu að brydda upp á skoðanakönnun á Facebook-síðu sinni, Brennslu Tips, um hvar bestu franskar á landinu væri að finna. Það stóð ekki á svörunum og hlustendur þeirra kepptust við að svara. Í morgun var farið yfir niðurstöður skoðanakannaninar í útvarpsþættinum og í kjölfarið var spjallið birt á Vísi.

Kara Kristel Ágústsdóttir, fyrrverandi samfélagsmiðlastjarna og kynlífsbloggari er hins vegar ekki par sátt við könnunina og tjáir sig um það á Facebook-síðu Brennslunnar.

„Kom bara hingað til að segja að það er algjör vitleysa að Prikið sé ekki inn í skoðanakönnun Vísis… Þær væru seinasti matur minn á jörðinni,“ skrifar hún og eflaust einhverjir henni sammála.

Þess má geta að staðirnir sem fengu flest atkvæði í kosningu um bestu frönskurnar voru meðal annars Búllan, Aktu Taktu, Skalli, Metro, Mandí, Snaps og Roadhouse.

Það má segja að hringnum hafi verið lokað því fyrrnefnd Kara Kristel skaust upp á stjörnuhimininn árið 2017 þegar hún hóf að blogga um kynlíf. Stuttu síðar varð hún fastagestur hjá útvarpsþættinum Brennslunni þar sem hún var með kynlífshorn alla fimmtudaga. Kara Kristel varð fljótt mjög umdeild og svo fór að hún fékk loksins nóg af frægðinni.

„Í svolítinn tíma hef ég hugsað mikið um þetta. Ég opnaði blogg um kynlíf í haust, það var í djóki. Ég á það til að ganga aðeins of langt í allskonar djóki, og hef alltaf gert. Ég er ekki sérfræðingur um kynlíf, alls ekki. Og ég er enginn kynlífsfíkill. En mér finnst gaman að segja sögur, og þegar ég geri það, geri ég það vel,“ skrifaði Kara Kristel á Instagram þegar hún tilkynnt að hún væri að draga sig í hlé úr sviðsljósinu.