Samfélagsmiðlastjörnurnar Camilla Rut og Eva Ruza öttu kappi í sjónvarpsþættinum Ísskápastríð á Stöð 2 í gærkvöldi. Camilla var með Evu Laufeyju Kjaran í liði en Eva og Guðmundur Benediktsson, eða Gummi Ben, mynduðu sterka liðsheld.
Meðal þess sem Eva Ruza reiddi fram voru karamelluhjúpaðar paprikur, en eldamennskan tók óvænta stefnu þegar að Eva gleymdi sér aðeins við pönnuna.
„Shit,“ sagði Eva þegar hún ákvað að smakka brennandi heita papriku í sykurlegi. „Ég svitnaði bara. Ekki smakka paprikuna ef þið eruð búin að hita hana með sykri. Hún er heit,“ bætti Eva við á meðan liðsfélagi hennar Gummi Ben hló og hló.
Eva og Gummi náðu mjög vel saman í eldhúsinu og var Eva meira að segja farin að tala um að þau tvö ættu að búa saman, svo lengi sem makar þeirra leyfðu. Þegar kom að því að kynna réttinn fyrir dómurunum Hrefnu Rósu Sætran og Sigga Hall fengu þau Eva og Gummi toppeinkunn en ítrekuðu fyrir áhorfendur að smakka ekki paprikurnar þegar þær væru heitar.
„Sjóðandi heitar eru þær stórhættulegar,“ sagði Gummi.