Spjallþáttastjórnandinn Jimmy Fallon þolir ekki mæjónes, eina vinsælustu sósu í heimi. Þessu ljóstraði hann upp í þætti sínum í vikunni þegar hann ræddi við fyrirsætuna Kendall Jenner um hvaða matur væri ekki í uppáhaldi hjá henni.
Kendall sagðist hata banana því faðir hennar hafi borðað þá í tíma og ótíma í uppvexti hennar. Jimmy gerði gesti hins vegar agndofa þegar hann sagðist ekki geta borðað mæjónes.
Ástæðan fyrir því er sú að hann festi höfuð sitt eitt sinn á milli járnstanga og amma hans kom honum til bjargar.
„Þannig að amma sagði: Við verðum að losa hann. Smyrjum hann vel. Þannig að hún smurði mæjónesi yfir allt höfuðið mitt,“ segir Jimmy í meðfylgjandi myndbroti. Til að bæta gráu ofan á svart var mjög heitt úti þannig að lyktin varð óbærileg.