Stjörnukokkurinn og Íslandsvinurinn Gordon Ramsay og eiginkona hans Tana eiga von á sínu fimmta barni. Þetta tilkynntu þau í myndbandi á Instagram-síðu kokksins á gamlárskvöld.
Gordon og Ramsay eiga dótturina Megan, 21 árs, dótturina Matildu, 17 ára og tvíburasystkinin Jack og Holly, 19 ára. Eins og sést í myndbandinu hér fyrir neðan er Tana komin með myndarlega kúlu og því eflaust ekki langt í fimmta gleðigjafann.
Eins og áður segir tilkynntu hjónin þetta í gærkvöldi, á gamlárskvöldi, en tvíburasystkinin Jack og Holly eiga einmitt afmæli á gamlársdag.
Gordon og Tana misstu fóstur í júní árið 2016 og kokkurinn sagði í viðtali við Daily Mail að sá harmleikur hafi styrkt fjölskylduböndin.
„Þetta hefur gert okkur öll nánari,“ sagði Gordon og hélt áfram. „Maður fattar hve heppinn maður er og maður lítur yfir farinn veg um hve lánsamur maður er með börnin sín og minnir sig á hvað maður hefur. Þetta hefur gert fjölskylduböndin enn sterkari.“
Tana heitir fullu nafni Cayetana Elizabeth Hutcheson, en þau Gordon gengu í það heilaga árið 1996 og fögnuðu nýverið 22ja ára brúðkaupsafmæli sínu.
Matarvefurinn óskar Ramsay-fjölskyldunni innilega til hamingju.