Það virðist vera ofureinfalt að harðsjóða egg en það getur þó valdið einhverjum kvíða þegar rauðan ákveður að sveipa sig grænum ljóma eða þegar það reynist þrautinni þyngra að ná skurninni af.
Hins vegar er leikur einn að forðast þessi vandamál með því að fylgja fjórum einföldum skrefum.
Setjið eggin í pott og hyljið þau með köldu vatni. Best er að nota egg sem hafa setið í ísskápnum í nokkra daga þar sem skurnin er þrautseigari í nýjum eggjum. Auðvitað verður samt að passa að eggin séu ekki orðin skemmd.
Setjið pottinn á hellu og náið upp suðu. Þá er slökkt á hitanum, lok sett á pottinn og potturinn tekinn af hellunni. Eggin eru látin malla í heitu vatninu í níu mínútur ef um meðalstór egg er að ræða og í tólf mínútur ef um stór egg er að ræða.
Þegar tíminn er liðinn eru eggin tekin úr heita vatninu og sett í stóra skál af köldu vatni. Þegar eggin ná stofuhita er komið að því að taka skurnina af þeim.
Setjið egg undir lófann og rúllið því á borðplötu til að brjóta skurnina. Setjið eggið síðan aftur í skálina með vatninu og takið skurnina af. Einnig er hægt að setja eggið undir rennandi vatn til að taka skurnina af. Þá er það komið – fullkomin harðsoðin egg.
