Fitness-stjarnan Kristbjörg Jónasdóttir er í áhugaverðu viðtali á Smartlandi, til dæmis um mataræði. Í viðtalinu spyr Marta María Jónasdóttir Kristbjörgu spjörunum úr, til dæmis um hvernig hefðbundinn dagur sé, matarræðislega séð.
„Ég byrja yfirleitt á hafragraut, svo er það kjúklingur og hrísgrjón í hádeginu og annað hvort boost eða egg, avocado eða flatkökur yfir daginn. Prótein pönnukökur, eitthvað svoleiðis,“ segir Kristbjörg. En hvað með kvöldmatinn?
„Í kvöldmat er eitthvað sem okkur langar í hverju sinni,“ segir hún og bætir við að oftast verði kjúklinga- eða fiskréttur fyrir valinu.
Kristbjörg er eiginkona Arons Einars Gunnarsson, landsliðsfyrirliða í knattspyrnu, og búa þau í Bretlandi. Kristbjörg segir þau hjónakornin ávallt taka íslenskan mat með sér til Bretlands eftir frí á Íslandi.
„Alltaf í hverri einustu ferð þegar við komum hingað förum við allavega með hálfa ferðatösku af íslenskum mat aftur,“ segir hún. Það sem leynist í töskunni er pítusósa, hamborgarasósa, flatkökur, ostar og fiskur frá föður Kristbjargar, sem er sjómaður.
„Borðar fólk eins og þið hamborgarasósu og pítusósu? Er það ekki eitthvað svona sem er yfirleitt á bannlista hjá fólki sem hugsar vel um heilsuna?“ spyr þá Marta María.
„Mitt mottó er að allt er gott í hófi,“ segir Kristbjörg og brosir. „Þú þarft ekkert að drekkja pítunni þinni í pítsusósu en það er allt í lagi að fá sér smá.“
Sjá viðtalið í heild sinni hér fyrir neðan: