Með jólavertíðinni fylgir bakstur, þá sérstaklega smákökubakstur. Okkur á matarvefnum finnst einstaklega gaman þegar að lesendur senda okkur matartengdar spurningar og reynum við eftir bestu getu að svara þeim.
Sjá einnig: Spurningum ykkar svarað: Er í lagi að frysta egg?
Við fengum mjög áhugaverða spurningu á dögunum sem tengdist lakkrístoppum, sem eru afar vinsælir um jól. Um er að ræða litlar marengskökur með lakkrískurli. Spurningin hljóðaði einhvern veginn svona:
„Góðan dag. Ég vona að þú getir hjálpað mér. Þannig er mál með vexti að ég er að prufa mig áfram í lakkrístoppabakstri. Fyrsta platan kemur vel út en síðan byrja topparnir að falla saman. Ég hef fylgt öllum mögulegum og ómögulegum marengsráðum, eins og að stífþeyta marengsinn í korter, opna ekki ofninn á meðan topparnir bakast og þeyta marengsinn í tandurhreinni skál. Hvað er ég að gera vitlaust?“
Einmitt það, hvað er þessi áhugabakari að gera vitlaust? Málið með marengs er, og ástæðan fyrir því að hann er svo dásamlegur, er að hann er loftkenndur. Þegar við þeytum og þeytum og þeytum myndast loft í marengsinum sem verður til þess að útkoman úr ofninum er þessi vinsæli eftirréttur sem margir elska.
Hins vegar er það svo þegar að lakkrístoppar eru bakaðir að mikið af deiginu þarf að bíða á meðan plata er inni í ofninum og lakkrístoppar að bakast. Þegar að deigið bíður við stofuhita fuðrar þetta dásamlega loft upp og lakkrístopparnir falla. Auðvitað er hægt að minnka uppskriftina og baka minna í einu, en við skulum horfast í augu við sannleikann: Hvert heimili þarf nóg af lakkrístoppum því þeir hverfa eins og dögg fyrir sólu.
Lausnin er því að geyma deigið einfaldlega í ísskáp á meðan lakkrístopparnir í ofninum bakast. Þannig helst loftið í deiginu og topparnir verða unaðslegir. Annað ráð er að þeyta alltaf upp í marengsdeiginu aftur og aftur þar til allir toppar hafa bakast. Það finnst okkur samt of mikið umstang og því mælum við hiklaust með ísskápnum.