Jólamyndband íslenska súkkulaðiframleiðandans Omnom hefur svo sannarlega snert við mörgum hjartastrengjum, en í myndbandinu má sjá nokkra loðna og krúttlega kettlinga leika sér í jólalegu umhverfi.
Athygli vekur að allir kettlingarnir í myndbandinu eru villikettlingar í heimilisleit á vegum samtakanna Villikettir, en Omnom styður samtökin með sölu á vetrarsúkkulaðinu 2018, Drunk Raisins & Coffee.
Með myndbandinu vill Omnom vekja athygli á villi- og vergangsköttum á Íslandi.
„Ímynd fólks af villiköttum er oft að þeir séu illir og grimmir kettir en vegna ömurlegra aðstæðna, oft af mannavöldum, eru þeir illa á sig komnir og varfærir, sérstaklega gagnvart mannfólki sem þeir ekki þekkja. Í eðli sínu eru villi-og vergangskettir hvorki illir né ógurlegir.
Tilvist katta í neyð er staðreynd á Íslandi og á meðan ekki er skipulagt hvernig eigi að sinna þeim er erfitt að koma í veg fyrir fjölgun þeirra. Samtökin þurfa sérstaklega á aðstoð að halda þar sem veturinn er að skella á,“ stendur í fréttatilkynningu frá súkkulaðiframleiðandanum.
Við mælum með því að horfa á þetta jólalega myndband hér fyrir neðan og ef andi jólanna grípur þig er alltaf hægt að bjarga einum kettlingi í neyð.