Hin svokallaða „best fyrir“-dagsetning á matvælum er alls ekki heilög og oft er í góðu lagi með mat þótt liðinn sé langur tími frá síðasta söludegi. Vissulega eru sum matvæli viðkvæmari en önnur og bera þess fljótt merki að þeim þurfi að henda fljótlega eftir „best fyrir“-dagsetningu eða síðasta söludag. Mjólk, ostur og kjötvörur eru gott dæmi um slík matvæli.
En hvað með allan pakkamatinn og niðursuðuvörurnar sem leynast djúpt inni í skápunum? Eða sósuflaskan sem er búin að vera innst inni í ísskápnum frá því að þú manst eftir þér?
Ef marka má samantekt fréttamiðilsins Time, sem fékk sérfræðinga og matvælaframleiðendur með sér í lið, þá má jafnvel geyma matvæli í nokkur ár eftir „best fyrir“-dagsetninguna. Oft er best að nota almenna skynsemi til að meta hvort í lagi er með matinn eða ekki.
En vert er þó að hafa í huga að til þess að matvæli geymist þarf auðvitað að nota réttar geymsluaðferðir. Yfirleitt er mælt með dimmum og þurrum stöðum fyrir óopnaðan þurrmat og niðursuðuvörur, en eftir opnun geymast matvælin best í ísskáp.
Það er líklega ekki oft sem bjór nær því að fara fram yfir síðasta söludag áður en hann er drukkinn, en ef slíkt gerist þá ætti að vera í góðu lagi með hann í allt að fjóra mánuði.
Flestir kannast við að púðursykurinn verði grjótharður ef það það gleymist að loka pokanum. Og þá er honum yfirleitt hent. En ef púðursykur er geymdur í loftþéttum poka á þurrum og svölum stað geymist hann ansi lengi. Best er að nota almenna skynsemi til að meta hvort það sé í lagi með hann.
Það gerist eflaust ekki á mörgum heimilum að súkkulaði fari fram yfir síðasta söludag, en það ætti engu að síður að vera í góðu lagi með það allt upp undir ár frá framleiðsludegi. Framleiðsludagurinn er reyndar ekki alltaf gefinn upp á umbúðum, en þá kemur almenn skynsemi að góðum notum.
Kaffi geymist í allt að tvö ár í óopnuðum umbúðum, á svölum og þurrum stað. Hafi umbúðirnar verið opnaðar geymist það í um mánuð í ísskáp.
Það kemur líklega ekki mörgum á óvart, en pasta geymist í um það bil ár eftir „best fyrir“-dagsetninguna.
Tilbúnir frosnir réttir hafa ansi langan endingartíma. En það er talað um að óhætt sé að neyta flestrar slíkrar fæðu 12 til 18 mánuðum eftir síðasta söludag.
Óopnaðir pokar af frosnu grænmeti geymast í allt að tvö ár eftir síðasta söludag. Hafi pokarnir hins vegar verið opnaðir er geymslutíminn ekki nema um mánuður.
Óupptekin flaska af tómatsósu geymist í um ár eftir síðasta söludag, en eftir þann tíma fer líklega bæði bragð og litur að dofna. Það ætti samt að vera óhætt að neyta hennar. Opnuð flaska geymist hins vegar í um fjóra til sex mánuði.
Óopnuð krukka af majónesi geymist mjög lengi, en bragðgæðin minnka með tímanum.
Opin krukka geymist í tvo til þrjá mánuði.
Sinnep geymist í allt að tvö ár eftir síðasta söludag. Eftir þann tíma fer bæði bragð og litur að dofna, en það ætti hins vegar að vera óhætt að borða það.
Olían geymist í tvö ár frá framleiðsludegi, en eftir það fara bragðgæði að dofna. Það er hins vegar alveg óhætt að nota hana til matreiðslu eftir þann tíma.
Líkt og önnur þurrvara geymast hrísgrjón ansi lengi. Það ætti að vera í lagi að borða þau allt að tveimur árum eftir síðasta neysludag.
Það ætti að vera í góðu lagi að nota salatsósuna sem er búin að standa innst í skápnum í heilt ár. Hafi sósuflaskan hins vegar verið opnuð geymist hún ekki nema í níu mánuði í ísskáp.
Sterka sósan í litlu flöskunum sem allir þekkja. Flestir eiga eina slíka í ísskápnum og það minnkar hægt í flöskunni, enda yfirleitt lítið notað af sósunni í einu. Það er þó óþarfi að henda flöskunni þó hún hafi verið í ísskápshurðinni árum saman. Tabasco-sósan geymist nefnilega í allt að fimm ár eftir síðasta söludag, á köldum og þurrum stað.