Stundum er best að vera ekkert að flækja eldamennskuna, eins og þetta snilldarráð frá kokkinum Richard Bainbridge, sannar. Richard ætti að vita hvað hann syngur enda bar hann sigur úr býtum í matreiðslukeppninni Great British Menu og rekur sinn eigin veitingastað, Benedicts Restaurant, í Norwich á Englandi.

Í samtali við fjölmiðilinn Mirror segir Richard að það þurfi bara eitt leynihráefni til að gera jólamáltíðina ómótstæðilega.

Hann segist mylja niður einn kjúklingakraftstening yfir kartöflurnar og fuglakjötið áður en hann steikir það og heldur því fram að maturinn verði „epískur“ fyrir vikið.

Það er allavega þess virði að prófa þetta einfalda ráð, enda hljómar það mjög vel.