Hver man ekki eftir partípítsunni frá Hróa Hetti? Þrjátíu tommu risapítsur sem voru taldar henta vel í afmælisveislur. Nú hefur Domino’s í Ástralíu ákveðið að toppa partípítsu Hróa Hattar og býður upp á fjörutíu tommu pítsu sem þeir kalla einfaldlega pítsu sumarsins, enda sumar í Ástralíu.
Pítsunni er skipt í fernt og í hverjum fjórðungi eru þrjár risastórar sneiðar. Pítsurnar fjórar sem sameinast í risapítsunni eru Pepperoni, Supreme, BBC Meatlovers og Hawaiian – eitthvað fyrir alla.
Aðeins er hægt að fá tvær slíkar pítsur á dag í útibúum Domino’s í Ástralíu en panta þarf pítsurnar með sólarhringsfyrirvara, enda mikið verk að baka fjörutíu tommu pítsu.
Þá er ekki hægt að fá pítsuna senda heim, en gaman er að segja frá því að Domino’s létu hanna sérstaka pítsakassa fyrir risapítsuna vegna þyngdar. Maður getur svo sem alveg látið sig hafa það að sækja ferlíkið, enda kostar það ekki nema fimmtíu ástralska dollara, eða tæplega 4500 krónur. Ferð til Ástralíu eingöngu til að næla sér í risapítsuna er hins vegar talsvert dýrari.