Top Chef-kynnirinn Padma Lakshmi er liðtæk í eldhúsinu en hún og dóttir hennar, Krishna baka mikið fyrir jólin. Í viðtali við Architectural Digest ljóstrar hún upp leyndarmálinu á bak við fullkomið piparkökuhús.
„Við búum til piparkökuhús næstu helgi í anda Mörthu Stewart,“ segir Padma og vísar í meistarakokkinn Mörthu Stewart, sem þarf vart að kynna.
„Hér er frábært ráð. Þetta tók mig mörg ár að finna út úr. Flestar leiðbeiningar sem koma með piparkökuhúsapökkum segja þér að setja saman húsið með glassúr og skreyta það síðan. Þið ættuð sko aldeilis ekki að gera það,“ segir sjónvarpsstjarnan.
Að sögn hennar á að skreyta alla parta hússins áður en það er sett saman, annars getur skrautið lekið niður hliðarnar. Þannig að ef þið viljið hlusta á Pödmu þá ættuð þið að raða öllum hlutum piparkökuhússins í einfalda röð á borði og hefjast handa við að skreyta. Leyfið ímyndunaraflinu að leika lausum hala og notið hvað sem þið eigið til að gera húsið sem fallegast – hvort sem það er kökuskraut, nammi, morgunkorn eða rúsínur. Bíðið síðan eftir því að glassúrinn þorni alveg og setjið húsið svo saman. Fullkomið!